الشروط والأحكام
عن هالشروط
هالشروط بتنظّم استخدامك لموقع kaju-creative.com وطريقة تعاملنا معك. تفاصيل كل مشروع (النطاق، المخرجات، المدة، الأتعاب، الدفع) بتنكتب بعرض السعر أو الاتفاقية الموقّعة، وهي اللي بتحكم إذا تعارضت مع هالصفحة.
عروض الأسعار
ما عنا باقات ثابتة. كل عرض مكتوب بيكون صالح للمدة المذكورة فيه، وما بنبلّش أي شغل قبل موافقتك الخطية (إيميل أو واتساب أو توقيع).
ميزانية الإعلان
ميزانية الإعلان بتدفعها أنت مباشرة للمنصات (Meta، Google، TikTok وغيرها) وهي منفصلة عن أتعابنا. المنصات ممكن ترفض أو توقف إعلانات حسب سياساتها، وهذا خارج عن سيطرتنا، بس بنساعدك تتعامل معه.
الحسابات والملكية
صفحاتك وحساباتك الإعلانية والبكسل بتضل ملكك وباسمك. إحنا بنشتغل بصلاحيات بتقدر تسحبها أي وقت. بعد دفع الأتعاب كاملة، حقوق التصاميم والمحتوى النهائي المسلَّم بتنتقل إلك، إلا الأدوات والقوالب العامة والخطوط والموسيقى المرخّصة اللي بتخضع لرخصها.
النتائج
بنلتزم بشغل منظّم وقياس شفاف، بس ما بنضمن عدد مبيعات أو ليدز أو ترتيب بمحركات البحث أو ظهور بأدوات الذكاء الاصطناعي، لأنها بتتأثر بعوامل خارج سيطرتنا مثل المنتج والسعر والمنافسة وسياسات المنصات وسرعة المتابعة.
التزاماتك
- تزويدنا بمعلومات صحيحة وصلاحيات لازمة بوقتها.
- التأكد إن المنتجات والعروض قانونية وإن عندك حق استخدام الصور والعلامات اللي بتعطينا ياها.
- الرد على العملاء المحتملين بسرعة، لأنه جزء أساسي من النتيجة.
السرية
بنتعامل مع معلومات مشروعك وأرقامك بسرية، وما بننشر اسمك أو نتائجك أو أي تقييم إلا بموافقتك الخطية.
الإيقاف
مدة الإشعار لإيقاف الخدمات الشهرية بتنذكر بالعرض. عند الإيقاف بنسلّمك الملفات المدفوعة وبنشيل صلاحياتنا من حساباتك.
القانون المطبّق
هالشروط بتخضع لقوانين المملكة الأردنية الهاشمية، ومحاكم عمّان هي المختصة بأي نزاع.
تواصل
لأي سؤال: kajucreative1@gmail.com أو +962 78 100 6036.